قصة من التراث (اللوبابة)

[سنابسي]

انا باكتبها بالعامية تكون احسن :D

المهم ندخل بالقصة

(الحلقة الاولى)


كان فيه مره فقيرة وعندها ولد صغير كل مرة تطلع يروح وياها حتى لو تروح ( السموعة) وفي يوم من الأيام كان مع أمه وفي الطريق قرب (الماتم ) هناك مره تبيع لوبه وهو جوعان ومه مسكينة ما عندها فلوس فقام يصرخ أماه أمبة لوبة قالت له من وينه ليي لفلوس حتى أشتري لك فقامت مرة واشترت له ففرح وأخذ الطاسة وقال في نفسه أللحين أنا لواكلته اهنيه كل واحد بيقول ليي أمبه أنا لازم أروح آكله عند المقبرة وفعلاً راح داخل المقبرة و قام ياكل وفجأة ما شاف ألا وحدة طالعة إله ومن شافها قام يرتجف وخاف لكنها قالت له لا تخاف أني بس أبغي منك لوباية وحدة وباخليك أتصير غني قال ليها أنتين تلعبي عليي قالت له أفا عليك أنت بس أعطيني لوباية وحدة وشوف أني ويش بعطيك ....

سوف نعرف ماذا أعطته وماذا سيصنع به وهل سيتصرف تصرفاً سليم وهل سيخبر أمه بما جرى ...
كل ذلك في الحلقة القادمة

[سنابسي]

الله يسامحكم نرجع نكتب الاجزاء الا راحت

[مروووش]

سنابسي

شوف إذا ماتكتب الباقي بسرعه

باشن عليك حرب عالميه

ابغى اعرف وشو صار بعدين

ننتظر جديدك

:0059:

تحياتي ....

[سنابسي]

يسلمووو مروش ع المرور وما عدمنا طلتك

[سنابسي]

اللوباية ( الحلقة الثانية )

تدروا ويش عطته أعطته الله أيعزكم حمار لكن ها الحمار عجيب قالت له بس بشرط ما تعلم ألا أمك لحمار الله يسلمكم يطلع من بطنه جواهر طبعاً ما صدقها إلا لما شاف بنفسه الجواهر وأخذ لحمار ومشى وهو مستانس وفي الطريق مر على السوق واحتاج يدش الحمام لكنه خاف على الكنز اللي عنده فقرر انه بأمنه عند بياع الحمير قي السوق ودخل الحمام ولما شاف الجواهر العجيبة قرر انه يبدله بواحد ثاني بسرعة قبل لا يطلع وفعلاً بدله وأخذ المسكين الحمار المزيف وراح بيتهم وعلم أمه بالقصة لكنها ما صدقت وقالت له لازم أشوف أبنفسي وانتظروا حتى تطلع الجواهر لكنهم تفاجئوا بشيء آخر..... وقامت أمه تضحك عليه وتقول له قوم طلع عنه هالحمار لايخيسنه وأخذ المسكين الكنز المغشوش وراح المقبرة وهو يصيح أمبة لوبايتي أطلعي يا الجنية لعبتي عليي وطلعة له وهي مستاءة من فعله لكنها ما قالت له السر بل أعطته شىء عجيب آخر !!!


...... أتدرون ماذا أعطته ستعرفون ذلك في الحلقة القادمة من اللوباية ..

[سنابسي]

اللوبابة (الحلقة الثالثة)



قلنا ليكم في الحلقة السابقة أنها أعطته شيء طبعاً تبغوا تعرفوا ويش هاالشي أعطته دجاجة بياضة لكنها اتبيض جواهر وأخذها وهو فرحان لكنه هالولد منحوس أمه قالت له قبل لا ترد للبيت أشتري لينا خبز من الخباز لكنه خاف الدجاجة تنحاش فقال بخليها عند راعي الدجاج لين أخلص وبعدين الخباز زحمة واجد وخلاها في القفص وتالي لاحظ البياع حاجة تبرق في القفص فتعجب وقال من وين هالجوهرة الثمينة أنا عمري ما شفت مثلها وتالي عرف السر لأن الدجاجة باضت جوهرة ثانية فقرر أنه يبدلها بوحدة ثانية وجاء الولد المسكين وأخذ الدجاجة التايوانية والأصلية صارة عند راعي الدجاج وراح البيت وعلم أمه بالسالفة وانتظروا الدجاجة اتبيض وكسروها وحصلوا داخلها محاحة بيضة واستحرقت عليه أمه وقالت له أنت كله تكذب عليي وطلع من بيتهم وهو مضايق وراح المقبرة وهو ايصيح أمبه لوبايتي.... وطلعت له المرة العجيبة وأعطته هالمرة صحن لكن هالصحن عجيب !!!

راح انشوف عجايب الصحن في الحلقة القادمة....

[سنابسي]

اللوباية ( الحلقة الرابعة )


وصلنا في الحلقة السابقة إلى أنها أعطته صحن عجيب ومن عجايب هالصحن أنك بس أتقول له دور ... دور يا صحن ونترس أكل ما تشوف إلا سفرة مليانة من جميع الأطعمة فرح لصبي وطار هالمرة على طول بيتهم وقال لمه يمه تعالي اليوم أنا باغديش على احسابي قالت له يا ولدي لاتتهزة عليي قال ليها بس أنتين غمضي وبتشوفي العجايب قالت له يا الله هداني باغمض وباشوف صدقك من كذبك وبعد ما غمضت قام يقول دور .... دور يا صحن ونترس أكل وما فتحت أمه عيونها إلا وقدامها خروف محشى ودجاج وهوامير مسدحه على السفرة وحلويات وكل ما لذ وطاب وحالاً طاحت غشيانة وقرب الدجاجة لمحشية تحت خشمها ووتعت وقالت له من وينه لك هالصحن يا ولدي قال ليها هذا من عند المرة العجيبة اللي طلعت ليي أول مرة ونتين ما تصدقيني المهم إنهم عاشوا مستانسين ويكالوا أحسن أكل ومرت الأيام في الأيام فكبر الولد وقرر انه يعزم السلطان..




لكن ويش اللي بصير هذا راح تشوفوه في الحلقة القادمة ....

[مروووش]

سنابسي يسلموو على الحلقات اللي حطيتهم

بس يالله بسرعه ابي اعرف وشو بيصير

السلطان وشو بيسوي

إلك لبكره إذا ماتكملها مانا خاش موضوعك

<<< عامل فيها بيهدد

ههههههههههههههههه

ننتظر جديدك

:0059:

تحياتي .....

[سنابسي]

هههههههههههههههه

يسلموو مروش ع المرور وما عدمناك والله كان اليوم بتخلص
بس الله يسامح المدير
هههههههههه
انتظر شوي
تشااو

[كل الغلا]

سنابسي يلا له
اندمجنا في السالفه مو تسويها لينا مسلسل مكسيكي الحين

وتسلم على القصه الحلوه
ماعدمنا طلتك

[سنابسي]

كل الغلا يسلموو
ع المرور وما عدمنا هالطلة
وخلك متابة ورحا تشوفي
وبنزل لك واحد الحين
تشااو

[سنابسي]

بسم الله الرحمن الرحيم


اول شي اسف على التاخير تحمستو عفر


قلنا في الحلقة السابقة أنه قرر يعزم السلطان وطبعاً السلطان ما يجي لحاله لكن وياه الوزراء والخدم والحشم ويوم دخلوا وقعدوا وقدم ليهم الشاي والقهوه والرطب وقعدوا يحارسوا الغدا ولكنهم ما شافوا شي وبعد لحظة ماشافوه إلا جايب صحن ويقول دور... دورياصحن ونترس أكل ونترست السفرة بجميع المأكولات واستغرب السلطان وحاشيته من اللي شافوه وقالوا له من وين لك هالصحن قال ليهم هذا وارثنه من أبويي ففكر السلطان في حيله حتى ياخد الصحن فقال لواحد من الحرس روح حالاً السوق وجيب ليي صحن يشبهه بالضبط وإذا جيت خشه حتى لاحد ينتبه لك ولما جاب الصحن الشبيه قال السلطان للوفد اللي معاه انتظروني بره البيت أنا كلام خاص ويا راعي البيت وهم طبعا ما يدروا عنه ويش بيسوي ولما طلعوا قال للولد جيب ليي ماي الله يخليك والولد راح على نيته مسكين ...


لكن بعدين شلي صار هذا راح اتعرفوه في الحلقة القادمة

طبعا باقي حلقة وحدة امبى حماس:26:

[وداع]

ههههههههههههههههههههههههههه

انه قايلة هالولد مخه يبي له فورمييت ,,

الحين ما دور يقول للصحن دوور إلا قدام الاوادم ؟؟

صج ما عنده سالفة .. هالخبل .. مدري اشفي مخه والله

جاان قال للصحن دوور قبل لا يجون الضيوف احسن له ,,

صج انه مقرووود لاحه وراه القراده مدري حابته القرادة وين ما يرووح وراه خخخ

على العموم مشكور اخوي سنابسي على القصة العجووبي

ويالله راونا الهمة وحط باقي الاجزاء ..


وسلامتكــــــم

تحياتووو

[سنابسي]

وداع يسلموو ع المرور وما عدمنا طلتك
وخلك متابعة وراح تشوفي الباقي
تشااو

[سنابسي]

ياللا نكمل


بسمه تعالى

الحلقة الاخيرة

قلنا في الحلقة السابقة أن الولد راح يجيب للسلطان ماي واهنيه استغل السلطان الفرصة وغير الصحن وعطاه الحارس اللي أخذ عليه العهود انه ما يقول لأحد وطلع بسرعة وجاء الولد المخدوع وعطاه الماء وشرب وقام يشكره على حسن الضيافة وطلع من بيتهم وفي اليوم الثاني قعد الولد مع أمه كالعادة علشان يتغدوا وهو يقول لمه ويش مشتهيه اليوم قالت له يا ولدي نبغي اليوم مندي تيس قال ليها بسيط وجود الصحن بيده وقال دور... دور يا صحن ونترس مندي تيس ولكن ما شافوا شي كالعادة قالت له أمه يمكن صحنا ما يسوي مندي يا الله قول له زي كل يوم وخلاص قال يا الله وقال الكلمة المعروفة لكن مافي فايدة وقعدوا داك اليوم حزنانين ويفكروا في السبب وبعدين قرر أنه يروح للمرة اللي عطته الصحن ويسألها ويوم وصل قام يصيح أمبة لوبايتي أمبة لوبايتي وطلعت له وقالت له أسمعني أني أللحين باعلمك ويش اللي صار عليك طول هالمدة ترى لحمار غيره راعي الحمير والدجاجة غيرها بياع الدجاج قال ليها والصحن قالت له بتتفاجاْ إذا قلت لك أن اللي غير الصحن هو السلطان ... السلطان معقولة قالت له نعم .. ولحين ويش أسوي قالت له أني بعطيك خيزرانة عجيبة انته بس تأمرها وهي تضرب لحالها قال معقول قالت له نعم وفعلاً راح لراعي الحمير وقال له وين احماري قال عطيتك اياه قال بعد اتكذب وهنيه قال للخيزرانة دوري ... دوري ياالخيزرانة ونتفي راعي الحمير وماشافها الاطايحة فيه ضرب وهويصرخ ويقول آي آي آي خلاص وقفها وبعطيك أحمارك وأمرها الولد ووقفت عن الضرب وأخد احماره وراح لبياع الدجاج وسوف اياه نفس الشي لين خلاه يطلع الدجاجة الحقيقية ولحين ويش بقى عليه اكيد تعرقوا بقى عليه السلطان لكنه خاف وتردد وتالي اذكركلام المرة اللي قالت له لاتخاف ولا بيصيدك شي وقرر أنه يدخل القصر وكان القصر مزدحم بالناس والضيوف من كل مكان واهنيه قام يفكر اللحين لو كلام المرة صحيح ويش راح يصير موقف السلطان ويش راح يسوي فيي لكنه تشجع ودخل وسلم عليه وقال يا مولاي السلطان يمكن أسالك سؤال اهنيه حس السلطان وقال ويش عندك ماتشوفني مشغول وعندي اضيوف ياالله اطلع ...اطلع بره واهنيه وبسرعة أمر الخيزرانة وقال ليها دوري ... دوري ياالخيزرانة وضربي اللي باق الصحن والناس كلهم مستغربين لما شافوها متجهه للساطان وقامت تضربة وهو يصيح آي آي ...آي الحقوني ياحرس وكل واحد من الحرس يقرب تضربه ضرب شديد وتضرب السلطان أشد وأقوه وهنيه قال خلاص ... خلاص وقفها أنا اللي بقت الصحن ... أنا اللي بقت الصحن واعترف السلطان وانفضح بين الناس وقرروا أنهم يعزلوه ويعينوا مكانه ..............
الولد الفقير اللي صار تالي عليهم أمير...................
وسلامتكم وانشاالله قصتنا عجبتكم

[وداع]

ههههههههههههههههههه

حللوة القصة ..

بس هو بعد غبي اتصرف تصرفات غبية وايد

و صار ذكي مرة وحدة في حياته وسووه سلطان ؟؟

جاان زين احناا

بس القصة واايد كشخة .. روووعــــة

بسلموو خيوو سنابسي على القصةالحلوة

والله يعطيك العافية يا رب

[كل الغلا]

يسلموا سنابسي على القصه الحلوه

بس عندي طلب واتمنى انك ماتخيبني

















































ياريت لو تقول لي وين المقبره اللي فيها المره و ....... وانت جاي في طريقك جيب لي لوبا

خخخخخخخخخ
تسلم وماعدمناك

[مروووش]

يسلمووو سنابسي على هالقصه

ماقلنا خلصناها على خير

نفع فيك التهديد شكله

هههههههههههههههههههههههههههههههههههه

القصه في قمة الروعه صراحه

والنهايه حلوه

تسلم أناملك على كتابتها وماعندم كتاباتك

ننتظر جديدك

:0059:

تحياتي .....

[سنابسي]

وداع يسلموو ع المرورو وما عدمناك

كلا الغلا شكرا لك ع المرور
اسمحي ليي ما اقدر اعلمك
اخاف تخلي الجنية تحدف عضويتي ادري تحقدي عليي


مرووش يسلموو ع المرور وما عدمنا طلتك


تشااو

[كل الغلا]

انت ما عليك سنابسي قول وين المكان وما يصير خاطرك الا طيب بخلها تزيد مشاركاتك<<<<<نصابه

راح تصير اول واحد في قائمة الأعضاء الأكثر مشاركه


يلا بس انت قول وخلي الباقي علي ولا تنسى اللوبه واذا خايف على الفلوس اتسلف لك من عند اي احد وبعدين رجعهم اله على راحتك وبالأقساط

[سنابسي]

خلاص
انتي جهزي حالك يوم العيد في محرم ان شاء الله
تشاو